Stúfa (Succisa pratensis)

Mynd af Stúfa (Succisa pratensis)
Mynd: Hörður Kristinsson
Stúfa (Succisa pratensis)

Útbreiðsla

Finnst aðeins syðst á landinu, í Vestur-Skaftafellssýslu, Mýrdal og undir Eyjafjöllum, í Vestmannaeyjum og á örfáum stöðum sunnan á Reykjanesskaga (Hörður Kristinsson 1998).

Búsvæði

Grasbrekkur, einkum móti suðri (Hörður Kristinsson 1998).

Lýsing

Fremur lágvaxin planta (15–35 sm) með allstór laufblöð í stofnhvirfingu og mörg, fjólublá blóm í þéttum kolli. Blómgast í júlí–ágúst.

Blað

Stöngullinn langur, blaðfár. Stofnblöðin stilkuð, í hvirfingu, lensulaga eða oddbaugótt, allstór, 3–12 sm á lengd og 2–5 sm á breidd, nær heilrend, gishærð (Hörður Kristinsson 1998).

Blóm

Blómin eru mörg og standa þétt í hnöttóttum kolli sem er 1,5–2 sm í þvermál. Einstök blóm 5–6 mm í þvermál, bláfjólublá, sjaldnar hvít, fjórdeild, með fjórum fræflum og einum stíl. Bikar og króna hvíthærð utan (Hörður Kristinsson 1998).

Aldin

Aldinin eru hnetur með svifkransi (Stefán Stefánsson 1948).

Greining

Líkist helst rauðkolli sem er þó með rauðari og flatari koll sem líkist fremur körfu í lögun. Eins hefur rauðkollur fjaðurskipt blöð en ekki stúfan.

Útbreiðsla - Stúfa (Succisa pratensis)
Útbreiðsla: Stúfa (Succisa pratensis)

Höfundur

Var efnið hjálplegt? Aftur upp

Aftur upp

Takk fyrir!

Hvað má betur fara?

  • Fela
  • |