Geldingahnappur (Armeria maritima)

Mynd af Geldingahnappur (Armeria maritima)
Mynd: Hörður Kristinsson
Geldingahnappur (Armeria maritima)

Útbreiðsla

Geldingahnappur er mjög algengur um allt land. Hann vex einkum á melum, söndum og þurru mólendi. Hann er mikið á hálendi Íslands og finnst víða upp í 1000 til 1100 m hæð í fjöllunum. Hæst hefur hann fundist á Tungnahrygg á Tröllaskaga í 1300 m hæð (Hörður Kristinsson - floraislands.is).

Almennt

Rætur geldingahnapps voru étnar er hart var í ári, þær eru harðar undir tönn og kallaðar harðasægjur líkt og rætur lambagrassins (Ágúst H. Bjarnason 1994).

Búsvæði

Vex helst á söndum og melum en einnig í þurru gras- eða mólendi (Hörður Kristinsson 1998).

Lýsing

Geldingahnappur myndar þéttar stofnhvirfingar og stundum þúfur (6–18 sm), blómin eru bleik og mörg saman í kollum á löngum stilk. Blómgast í júní.

Blað

Stöngullinn blaðlaus, stutthærður. Blöðin striklaga, 15–50 mm á lengd en 0,5–1 mm á breidd, öll í stofnhvirfingum sem standa þétt saman og mynda stundum þúfu (Hörður Kristinsson 1998).

Blóm

Blómin standa þétt saman í hnöttóttum kolli sem er 1,5–2 sm í þvermál. Krónan bleik, 6–10 mm í þvermál, krónublöðin snubbótt. Bikarinn trektlaga með fimm rauðleitum rifjum og glærum himnufaldi á milli og hefur smátennur upp af rifjunum, hærður neðan til. Fimm fræflar. Ein fræva með fimm stílum sem eru með hvítum hárum neðst. Himnukennd, oft gulbrún hlífðarblöð eru á kollinum neðanverðum (Hörður Kristinsson 1998).

Greining

Geldingahnappur getur minnt á ljósbera en þekkist frá honum á blaðlausum stöngli og heilum krónublöðum en ljósberinn hefur gagnstæð blöð á stönglinum og djúpklofin krónublöð (Hörður Kristinsson 1998).

Útbreiðsla - Geldingahnappur (Armeria maritima)
Útbreiðsla: Geldingahnappur (Armeria maritima)

Höfundur

Var efnið hjálplegt? Aftur upp

Aftur upp

Takk fyrir!

Hvað má betur fara?

  • Fela
  • |