Útbreiðsla

Mjög algeng um allt land frá láglendi upp í 700–800 m hæð (Hörður Kristinsson - floraislands.is).

Búsvæði

Hálfdeigir bakkar, rakar sendnar áreyrar, jaðrar þurrlendis og votlendis (Hörður Kristinsson 1998).

Lýsing

Hávaxin planta (25–45 sm) með sívölum stráum og blómum í þéttum hnapp fyrir ofan miðju strásins. Blómgast í júní–júlí.

Blað

Hún hefur sterkan jarðstöngul sem skríður áfram ár frá ári. Stráin eru sívöl, nálarlaga, stælt, stinn, sívöl, hol, 1,5–2 mm í þvermál. Blöðin mynda slíður neðst á stönglinum en enga blöðku (Hörður Kristinsson 1998).

Blóm

Nokkur blómhnoðu í þéttum hnapp sem virðast hliðstæð ofarlega á stráinu en í raun er það stoðblaðið sem blekkir. Það er sívalt með nálaroddi og stendur í beinu framhaldi af stráinu. Blómhlífin sexblaða. Blómhlífarblöðin odddregin, dökkbrún. Fræflar sex með gulgræna frjóhnappa. Frævan rauð með stuttum stíl og þrískiptu, bleiku fræni (Hörður Kristinsson 1998).

Aldin

Þrístrent og dökkbrúnt (Hörður Kristinsson 1998).

Greining

Líkist helst þráðsefi en hrossanálin þekkist á stæltari stráum og dekkri blómskipan, stoðblaðið er miklu styttra en stráið.

Höfundur