Útbreiðsla

Algeng um allt land frá láglendi upp í um 800 m hæð (Hörður Kristinsson - floraislands.is).

Búsvæði

Hún vex gjarnan í gilbrekkum, skriðum, klettabeltum, melum og mólendi, einkum móti sól (Hörður Kristinsson 1998 og floraislands.is).

Lýsing

Lágvaxin jurt (6–8 sm) með snubbóttum blöðum og heiðbláum blómum. Blómgast í júní.

Blað

Stöngullinn blöðóttur með örstuttum hárum ofan til, blöðin oddbaugótt eða langöfugegglaga, snubbótt, með örstuttum randhárum (Hörður Kristinsson 1998).

Blóm

Blómin eru um 1 sm í þvermál, í blómfáum klasa. Krónan virðist í fljótu bragði lausblaða en er þó samvaxin neðst, dettur af fullþroska blómum í heilu lagi. Krónublöðin fjögur, misstór, dökkblá en hvít neðst við nöglina og með rauðu belti. Fræflar tveir með hvítum frjóknöppum. Ein fræva með einum stíl (Hörður Kristinsson 1998).

Greining

Líkist helst fjalladeplu en steindeplan hefur stærri og flatari krónu, þekkist einnig á rauða beltinu innst í blóminu, minni og snoðnari blöðum. Þekkist á fjórdeildum blómum frá bæði blástjörnu og dýragrasi.

Höfundur