Útbreiðsla

Algengur um allt land frá láglendi upp í 1000 m hæð (Hörður Kristinsson - floraislands.is).

Búsvæði

Hann vex við lindir, læki, uppsprettur, í dýjum eða flögum og á áreyrum (Hörður Kristinsson 1998 og floraislands.is).

Lýsing

Lágvaxin jurt (3–15 sm) með blöðin í stofnhvirfingu og falleg, hvít blóm með gulum blettum á stöngulendum. Blómgast í júní–júlí.

Blað

Stöngullinn blaðlaus, gishærður. Blöðin stofnstæð, 1,5–2,5 sm á lengd, odddregin og gróftennt framan til, ofurlítið gishærð (Hörður Kristinsson 1998).

Blóm

Blómin eru 1–1,4 sm í þvermál, með stjörnulögun. Krónublöðin oddbaugótt til lensulaga, gisstæð, hvít með tveim gulum dílum neðst að innanverðu. Bikarblöðin 3–4 mm löng, rauðleit í oddinn á neðra borði. Fræflar tíu, frjóhirslur rauðgular. Frævan klofin efst, ljósgulgræn eða dökkrauð (Hörður Kristinsson 1998).

Greining

Líkist helst hreistursteinbrjóti sem vex aðeins hátt til fjalla, hefur mjórri blöð og blómgast venjulega ekki en myndar þyrpingu dökkmóleitra æxlikorna.

Höfundur