Ólafssúra (Oxyria digyna)

Mynd af Ólafssúra (Oxyria digyna)
Mynd: Hörður Kristinsson
Ólafssúra (Oxyria digyna)

Útbreiðsla

Fremur algeng um allt land, einkum til fjalla (Hörður Kristinsson - floraislands.is).

Almennt

Ólafssúran á sér mörg nöfn, sem dæmi má nefna bergsúra, fjallakál, hofsúra, hrútablaðka, kálsúra, lambasúra og súrkál (Ágúst H. Bjarnason 1994).

Nytjar

Ólafssúra hefur svipaða eiginleika og túnsúran hvað viðkemur grasalækningum (Arnbjörg Linda Jóhannsdóttir 1998) og blöðin eru að sama skapi bragðgóð (Hörður Kristinsson - floraislands.is).

Búsvæði

Vex einkum í skuggsælum giljum, skorningum, melum, urðum og fjallahlíðum (Hörður Kristinsson - floraislands.is).

Lýsing

Meðalhá planta (15–40 sm) með nýrlaga blöð og græn blóm í löngum klasa. Blómgast í maí–júní.

Blað

Blöðin þykk, nýrlaga, handstrengjótt, 2–6 sm í þvermál, stilklöng, hárlaus, flest stofnstæð. Blaðfóturinn myndar slíður um stöngulinn (Hörður Kristinsson 1998).

Blóm

Blómin smá, mörg saman í samsettum, klasakenndum blómskipunum á stöngulendunum. Blómhlífarblöðin fjögur, græn, nær kringlótt, misstór, 1–2 mm á lengd. Fræflar sex með gulum eða rauðbleikum frjóhirslum. Ein fræva með tveim stílum, frænin rauð, margskipt (Hörður Kristinsson 1998).

Aldin

Aldinið tvívængjuð hneta sem stendur töluvert út úr blóminu, 3–5 mm á lengd (Hörður Kristinsson 1998).

Greining

Líkist engri annarri íslenskri tegund, auðþekkt frá öðrum súrum á blaðlögun.

Útbreiðsla - Ólafssúra (Oxyria digyna)
Útbreiðsla: Ólafssúra (Oxyria digyna)

Höfundur

Var efnið hjálplegt? Aftur upp

Aftur upp

Thank you!

Hvað má betur fara?

  • Fela
  • |