Frjómælingar í Reykjavík og á Akureyri í apríl og maí 2010 – fréttatilkynning

10.06.2010

Fjöldi frjókorna í apríl og maí losaði 2000 frjó/m3 sem er það hæsta sem mælst hefur í Reykjavík. Birkifrjó hafa ekki verið fleiri síðan vorið 2006. Á Akureyri var mun minna um frjókorn enda tíðarfar fremur svalt. Hámark birkifrjóa þar verður nú í byrjun júní en ekki í maí eins og undanfarin ár. Framundan er frjótími grasa, túnsúru og hundasúru. Í júní eru frjótölur oftast lágar en geta farið yfir 10 þegar kemur fram í miðjan mánuðinn. Á stöðum þar sem gras er látið óslegið og það fær að blómgast og vaxa úr sér verða frjótölur þó mun hærri en mælingar sýna. Á Íslandi er grasofnæmi algengasta frjóofnæmið.

Frjótölur birki- og grasfrjóa birtast á vef NÍ sem súlur á myndritum jafnóðum og tölur liggja fyrir. Þar má sjá hvernig sumarið í ár kemur út m.t.t. frjó­mælinga fyrri ára, sjá hér. Frjótölur birtast einnig á síðu 169 í textavarpi RÚV og á vef Morgunblaðsins. þar eru þær uppfærðar einu sinni í viku.

Nánar um frjómælingar í apríl og maí 2010.