Frjókorn rauðelris láta á sér kræla

16.03.2011

Fáum dettur í hug frjókorn nú þegar jörð er alhvít. Hins vegar hafa hlýindin í síðari hluta febrúar og byrjun mars dugað til að rauðelrið fór af stað, opnaði og teygði úr karlreklunum sem nú hanga niður, þannig að vindur hefur greiðan aðgang að frjóhirslum og þar með geta frjókornin dreifst út í andrúmsloftið. Frjókorn elris eru samt mjög staðbundin við næsta nágrenni vaxtarstaðar trjánna.

Á myndinni má sjá rekla rauðelris. ©MH

Þann 6. mars var rauðelri kominn með blóm í görðum í Reykjavík. Elri, öðru nafni ölur, lat. Alnus, er af sömu ætt og birki og frjókornin geta valdið ofnæmi, einkum hjá þeim sem eru með ofnæmi fyrir birkifrjóum.

Elrið blómstrar áður en tréð laufgast. Fyrir þá sem vilja forðast elri þá er auðveldast að þekkja trén svona snemma árs á kúlulaga kvenreklum frá sl. hausti, sem enn hanga á smástilkum og geta minnt á köngla.

Á Íslandi hefjast frjómælingar ekki fyrr en um miðjan apríl þannig að við sem mælum frjókorn í lofti missum oftast af frjókornum elris, fáum reyndar lítið eitt af elrifrjóum í maí þegar grænelri lifnar við eftir vetrardvala. Vefsíða frjómælinga á Náttúrufræðistofnun er uppfærð reglulega þegar frjómælingar hefjast.

Nágrannalönd okkar eru farin að senda út tilkynningar um frjómælingar. Þær má t.d. finna hjá DMI Vejr, klima og hav í Danmörku, Norges astme- og allergiforbund í Noregi Naturhistoriska riksmuseet í Svíþjóð og Polleninfo.org sem er vefur sem heldur utan um frjómælingar í Evrópu, m.a. frá Íslandi.

Upplýsingar sem þar koma fram gætu komið því fólki að gagni, sem haldið er frjóofnæmi og hyggur á ferðalög til útlanda.