Sameindaerfðafræði til að meta líffræðilega fjölbreytni á Hrafnaþingi

Grunneining líffræðilegrar fjölbreytni í stofni er erfðabreytileiki einstaklingsins. Stofnar, tegundir, ættkvíslir og heilu vistkerfin standa og falla með fjölbreytileika erfðamengja einstaklinganna. Erfðabreytileiki stofns gefur innsýn í lýðfræðilega byggingu og þróunarsögu stofns. Þannig er skortur á erfðabreytileika til vitnis um að stofn hafi hrunið, á meðan mikill erfðabreytileiki í stofni er til marks um heilbrigða blöndun á erfðabreytileika.

Kristinn P. Magnússon, sameindaerfðafræðingur á Náttúrufræðistofnun, flytur erindi sitt Sameindaerfðafræði til að meta líffræðilega fjölbreytni á Hrafnaþingi miðvikudaginn 23. mars kl. 15:15 í húsakynnum Náttúrufræðistofnunar að Urriðaholtsstræti 6-8 í Garðabæ (sjá kort).