Rekstur Náttúrufræðistofnunar á pari við samþykkta rekstraráætlun - Yfirlýsing vegna fréttar um agaleysi í rekstri ríkisstofnana

04.11.2013

Í fréttum RÚV í gærkvöldi og í dag 4. nóvember er sagt frá nýrri skýrslu Ríkisendurskoðunar þar sem stjórnendur ríkisstofnana eru gagnrýndir fyrir skort á aga í rekstri. Í skýrslunni segir að 38% ríkisstofnana hafi farið fram úr áætlunum á fyrri hluta þessa árs. Nokkrar stofnanir eru tilgreindar sérstaklega í skýrslunni og þar á meðal Náttúrufræðistofnun Íslands, sem á að vera með „umtalsverðan greiðsluhalla í rekstri“. Þetta er rangt. Fjárhagsstaða Náttúrufræðistofnunar var á pari (innan við 2% frávik) við samþykkta rekstraráætlun fyrir árið 2013 eftir fyrstu 6 mánuði ársins.

Aðhalds hefur verið gætt í rekstri stofnunarinnar frá hruni og hefur afkoma hvers árs verið innan 4% vikmarka fjármála- og efnahagsráðuneytisins öll árin. Síðustu 3 árin hefur staða stofnunarinnar um áramót vikið um 1% (plús eða mínus) frá samþykktum rekstraráætlunum. Það er því ekki fótur fyrir því að setja Náttúrufræðistofnun í hóp með stofnunum sem fara fram úr fjárhagsáætlunum sínum og eiga við umtalsverðan greiðsluhalla að etja eins og gert er í skýrslu Ríkisendurskoðunar.