Merkilegar kvikmyndir um gosið í Surtsey komnar í leitirnar

25.02.2014
Úr kvikmynd Þorleifs Einarssonar frá Surtseyjargosi
Mynd: Þorleifur Einarsson
Úr kvikmyndum Gunnbjörns Egilssonar og Þorleifs Einarssonar.

Á Hrafnaþingi Náttúrufræðistofnunar þann 19. febrúar sl. voru sýndar nýfundnar kvikmyndir af eldgosinu í Surtsey. Eftir sýningu myndanna voru þær afhentar Surtseyjarfélaginu til eignar en Náttúrufræðistofnun Íslands sér um varðveislu þeirra.

Kvikmyndirnar voru teknar á 8 mm filmu af þeim Þorleifi Einarssyni jarðfræðingi og Gunnbirni Egilssyni starfsmanni hjá Atvinnudeild háskólans og síðar Rannsóknastofnun atvinnuveganna. Þær eru frá upphafi eldsumbrota í Surtsey og eru þær fyrstu teknar 18. nóvember 1963 eða aðeins fjórum dögum eftir að gossins varð vart. Myndirnar eru teknar úr flugvél, af skipi og fyrst eftir að farið var í land í Surtsey. Kvikmyndirnar eru mikilvægar heimildir um gosið og geta nýst við rannsóknir á eldsumbrotum í Surtsey.

Það voru þær Sólveig Jakobsdóttir, barnabarn Gunnbjörns Egilssonar, og Ásta Þorleifsdóttir, dóttir Þorleifs Einarssonar, sem afhentu þeim Hallgrími Jónassyni, formanni Surtseyjarfélagsins, og Jóni Gunnari Ottóssyni, forstjóra Náttúrufræðistofnunar, kvikmyndirnar.

Afhending Surtseyjarkvikmynda á Hrafnaþingi 19. febrúar 2014
Mynd: Kjartan Birgisson

Frá afhendingu kvikmyndanna. Frá vinstri: Jón Gunnar Ottósson, Hallgrímur Jónasson, Ásta Þorleifsdóttir og Sólveig Jakobsdóttir.