Grasfrjó í lofti

15.06.2016
Háliðagras
Mynd: Erling Ólafsson
Háliðagras með áberandi fræflum sem standa út úr öxunum

Fyrstu grasfrjó sumarsins eru farin að líta dagsins ljós þannig að þeir sem haldnir eru ofnæmi gætu farið að finna fyrir einkennum. 

Á höfuðborgarsvæðinu hafa veðurskilyrði undanfarna daga verið góð til dreifingar frjókorna því það hefur verið hlýtt, þurrt og svolítil gola. Grös eru nú farin að blómgast og komu fyrstu frjókornin í gildruna í Garðabæ þann 4. júní. Eftir það hefur þeim fjölgað og var frjótalan í 11 frjó/m3 þann 12.júní. Það eru einkum ilmreyr og háliðagras sem eru að dreifa frjókornum þessa dagana. Búast má við frjókornum frá grösum næstu vikurnar en aðalfrjótíminn er í júlí og ágúst.

Þeir sem eru haldnir grasofnæmi ættu að vera á verði, sérstaklega nálægt óslegnu grasi. Best er að slá gras áður en það blómgast því þá myndast ekki frjó. Einnig er gott að hafa í huga að þurrka ekki þvott úti þegar mest hætta er á frjókornum og sofa við lokaðan glugga.

Fari frjótölur grass yfir 10–20 frjó/m3 á einum degi má búast við að ofnæmiseinkenna verði vart en það er þó einstaklingsbundið hversu næmt fólk er. 

Ilmreyr
Mynd: Erling Ólafsson

Ilmreyr með áberandi fræflum sem standa út úr öxunum