Hlýnun jarðar og umsvif mannsins auka hættu á aðflutningi ágengra framandi tegunda á norðurslóðum

16.05.2017
Forsíða Arctic Invasive Alien Species
Mynd: Jean-Jacques Boujot

Brúnrottta á forsíðu skýrslunnar Arctic Invasive Alien Species: Strategy and Action Plan.

Norðurskautsráðið hefur gefið út stefnu og aðgerðaráætlun um að hefta yfirvofandi aðflutning ágengra framandi tegunda á norðurslóðum og kallar eftir að henni verði hrint fljótt í framkvæmd. Aðflutningur ágengra framandi tegunda á norðurslóðum mun hafa áhrif á líffræðilega fjölbreytni á heimsvísu, ógna tegundum, spilla vistkerfum og hafa ýmis efnahagsleg áhrif.

Í dag eru fáar framandi tegundir á norðurslóðum en búast má við auknum aðflutningi þeirra með hlýnandi loftslagi og auknum umsvifum eins og vaxandi áhuga á vinnslu auðlinda, búsetu og ferðamennsku. Því er mikilvægt að grípa strax til aðgerða. Aðkallandi er að miðla þekkingu til stjórnvalda og koma af stað vöktunar- og aðgerðaráætlunum.

Stefnan og aðgerðaráætlunin The Arctic Invasive Alien Species (ARIAS) Strategy and Action Plan, er unnin af The Conservation of Arctic Flora and Fauna (CAFF) og The Protection of the Arctic Marine Environment (PAME) sem eru vinnuhópar innan Norðurskautsráðsins. Náttúrufræðistofnun Íslands tekur þátt í verkefninu fyrir hönd Íslands.