Fréttir

Hrafnaþing: Merkar jarðminjar á Torfajökulssvæði: Tilnefning á heimsminjaskrá?

25.11.2019
Á Torfajökulssvæðinu
Mynd: Kristján Jónasson

Litrík ummyndun í öskjufyllingu Torfajökulseldstöðvarinnar. Jökulgil suður af Hrafntinnuskeri. 14. ágúst 2008.

Hrafnaþing Náttúrufræðistofnunar Íslands verður haldið miðvikudaginn, 27. nóvember kl. 15:15–16:00. Kristján Jónasson jarðfræðingur hjá Náttúrufræðistofnun Íslands flytur erindið Merkar jarðminjar á Torfajökulssvæði: Tilnefning á heimsminjaskrá?

Torfajökulseldstöðin er einstök bæði á landsvísu og á heimsvísu og hefur hún meðal annars að geyma stærsta líparítsvæði og mesta háhitasvæði landsins. Árið 2013 var Torfajökulseldstöðin (Friðland að Fjallabaki) samþykkt af UNESCO á yfirlitsskrá Íslands, en það er fyrsti áfangi í tilnefningu svæðis til heimsminjaskrár UNESCO. Í yfirlitsskránni eru tiltekin fjögur atriði sem talið var að gætu uppfyllt viðmið UNESCO fyrir heimsminjasvæði, þrjú þeirra tengjast jarðminjum og eitt landslagi. Í erindinu verður farið yfir það hvaða jarðminjar það eru sem geta talist einstakar á heimsvísu og þeim lýst nánar.

Útdráttur úr erindinu

Hrafnaþing er haldið í húsakynnum Náttúrufræðistofnunar að Urriðaholtsstræti 6–8 í Garðabæ, í Krummasölum á 3. hæð. Því er jafnframt streymt á Youtube-rás stofnunarinnar.

Allir velkomnir!

  •