Viðmið um val á mikilvægum fuglasvæðum
Viðmið við val á mikilvægum fuglasvæðum á Íslandi er byggt á viðmiðum BirdLife International.
Tuttugu viðmið hafa verið þróuð til að velja mikilvæg fuglasvæði í Evrópu og eiga tíu við á Íslandi. Á grundvelli þeirra er hægt að greina alþjóðlega þýðingu svæða fyrir:
- Tegund í hættu
- Tegund sem verpur í byggðum eða safnast í stóra hópa
- Safn tegunda með takmarkaða útbreiðslu (á heimsvísu; á ekki við Ísland)
- Safn tegunda sem bundnar eru við eitt lífbelti
Töluleg viðmið hafa verið skilgreind á þann hátt að greina megi stigvaxandi alþjóðlegt mikilvægi svæðis fyrir tegund á þremur landfræðilegum skölum:
- Á heimsvísu (A-viðmið)
- Á Evrópuvísu (B-viðmið)
- Innan Evrópusambandsins (C-viðmið; á ekki við Ísland)
A: Á heimsvísu
A1. Tegund sem er í hættu á heimsvísu
Á svæðinu er vitað eða talið að reglulega sé að finna umtalsverðan hluta stofns tegundar sem er í hættu á heimsvísu eða ástæða er til að hafa áhyggjur af.
A3. Tegund bundin við eitt lífbelti
Á svæðinu er vitað eða talið að sé umtalsvert samsafn tegundar sem verpur að miklu eða öllu leyti í einu lífbelti.
A4. hópar/byggðir
i: Á svæðinu er vitað eða talið að reglulega sé að finna ≥ 1% af landfræðilega afmörkuðum stofni vatnafugls sem verpur í þéttum byggðum eða safnast í stóra hópa.
ii: Á svæðinu er vitað eða talið að reglulega sé að finna ≥ 1% af heimsstofni sjófugls eða þurrlendisfugls sem verpur í þéttum byggðum eða safnast í stóra hópa.
iii: Á svæðinu er vitað eða talið að reglulega sé að finna ≥ 20.000 vatnafugla eða ≥10.000 pör sjófugla af einni eða fleiri tegund.
B: Á Evrópuvísu
B1. hópar/byggðir
i: Á svæðinu er vitað eða talið að reglulega sé að finna ≥1% af farleiðarstofni eða öðrum skýrt afmörkuðum stofni vatnafugls sem verpur í þéttum byggðum eða safnast í stóra hópa.
ii: Á svæðinu er vitað eða talið að reglulega sé að finna ≥1% af skýrt afmörkuðum stofni sjófugls sem verpur í þéttum byggðum eða safnast í stóra hópa.
iii. Á svæðinu er vitað eða talið að jafnaði sé ≥1% af skýrt afmörkuðum farleiðarstofni eða öðrum skýrt afmörkuðum stofni annarra tegunda [en vatna- og sjófugla] sem verpa í þéttum byggðum eða safnast í stóra hópa.
B2. Tegund stendur höllum fæti í Evrópu.
Svæðið er eitt af þeim mikilvægustu í landinu fyrir tegund á evrópskum válista (CR, E, VU).
B3. Tegund með ákjósanlega verndarstöðu í Evrópu.
Svæðið er eitt af þeim mikilvægustu í landinu fyrir tegund með ákjósanlega verndarstöðu í Evrópu. Álfan er jafnframt höfuðheimkynni tegundar (SPEC 4; þ.e. >helmingur heimsstofns í Evrópu) og verndun svæðisins er talin koma tegundinni til góða (horft er framhjá litlum stofni á jaðri útbreiðslu tegundarinnar).
Töluleg viðmið sem skilgreing mikilvægra fuglasvæða byggist á (pdf)