Dröfnumý (Macropelopia nebulosa)

Útbreiðsla

Gjörvöll Evrópa, Asía austur til Japans, N-Afríka.

Ísland: Algeng um land allt, jafnt á láglendi sem hálendi.

Lífshættir

Dröfnumý elst upp í vötnum af ýmsu tagi, bæði næringarríkum og næringarsnauðum, stöðuvötnum og lækjum. Lirfurnar halda sig í botngrotinu, í rennandi vatni gjarnan hlémegin við steina. Þær skríða um frjálsar í botnleðjunni, eru ekki í hýði, og lifa á ránum. Flugtími er frá lokum maí til ágústloka.

Almennt

Dröfnumý er með stærri tegundum rykmýs hér á landi, á stærð við minni tegundir toppmýs (Chironomus). Tegundina má þekkja á stærðinni auk áberandi flikra við æðar á miðjum væng og á vænghimnu nær vængenda, sem aðgreina tegundina frá toppmýi. Rannsókn á kynfærum skal þó ávallt liggja til grundvallar tegundagreiningu. Eins og langflestar tegundir rykmýs hafa karlflugur áberandi fjaðraða fálmara en kvenflugur einungis venjulega þráðlaga fálmara.

Útbreiðslukort

Höfundur

Erling Ólafsson 20. september 2012.