Vetrarfuglatalningar 2020

16.12.2020
Grágæsahópur á Holtsósi undir Eyjafjöllum
Mynd: Kristinn Haukur Skarphéðinsson

Grágæsahópur á ísilögðum Holtsósi undir Eyjafjöllum í kvöldhúmi 18. nóvember 2020.

Árleg vetrarfuglatalning Náttúrufræðistofnunar Íslands fer fram helgina 2.-3. janúar næstkomandi. Markmið vetrarfuglatalninga er að kanna hvaða fuglategundir dvelja hér að vetrarlagi, meta hversu algengir fuglarnir eru og á hvaða landssvæði þeir halda sig.

Upplýsingarnar nýtast einnig til að fylgjast með langtímabreytingum á stofnum margra tegunda, til dæmis silfurmáfs.

Vetrarfuglatalningar, sem áður voru kallaðar „jólatalningar“, hófust hér á landi í desember 1952. Byggjast þær einvörðungu á sjálfboðaliðum og hafa margir þeirra tekið þátt um áratugaskeið.

Niðurstöður talninga verða settar inn á vefsíðuna Vetrarfuglatalningar jafnskjótt og þær berast og þar er einnig að finna samantekt talninga fyrri ára og talningareyðublað.

Nánari upplýsingar um vetrarfuglatalningar, einstök talningarsvæði og fleira veita Kristinn Haukur Skarphéðinsson, Guðmundur A. Guðmundsson og Svenja N.V. Auhage.