Aldurssamsetning rjúpna á veiðitíma 2006

Niðurstöður eru birtar jafnóðum hér á vef NÍ en þær verða meðal annars notaðar við mat á stofnstærð rjúpunnar í landinu.

Fyrstu niðurstöður frá veiðitíma 2006

8. desember 2006
Samtals er búið að aldursgreina 1274 fugla og hlutfall ungfugla af heildinni er 70%. Aldurshlutföllin eru breytileg eftir landshlutum. Hlutfall ungfugla er langsamlega lægst á Vesturlandi (45%) og virðist hafa orðið viðkomubrestur þar sumarið 2006. Einnig er hlutfall ungfugla lágt víðast hvar (61 til 70%) nema á Norðausturlandi og Austurlandi en þar er það 85% og 79%. Hliðstæður munur á hlutfalli ungfugla á milli landshluta var á veiðitíma 2005 en þá var hlutfall unga hæst á Suðvesturlandi og Vesturlandi en mun lægra í öðrum landshlutum. Vorið 2006 sýndu talningar að rjúpum hafði fækkað um allt land. Almennt hefur gilt að í uppsveifluárum er hlutfall ungfugla í hauststofni um 80%. Miðað við aldurshlutföll líkt og þau eru í hauststofninum í ár og atburðarásin í fyrra þá gera ráð fyrir að fækkun sem hafin var vorið 2006 muni halda áfram 2007.

Veiðitími 2006		8. desember 2006
Landshluti	Fullorðnir	Ungar	Samtals	% ungar
Suðvesturland	31	62	93	67%
Vesturland	95	78	173	45%
Vestfirðir	72	135	207	65%
Norðvesturland	57	91	148	61%
Norðausturland	64	350	414	85%
Austurland	23	87	110	79%
Suðurland	39	90	129	70%
Samtals	381	893	1274	70%

Sendið vængina til NÍ
Sérfræðingar Náttúrufræðistofnunar hafa um áratuga skeið rannsakað aldurshlutföll í rjúpnaafla. Á lit flugfjaðra rjúpunnar er hægt að greina á milli tveggja aldurshópa, fugla á fyrsta ári og eldri fugla. Þessi gögn eru m.a. notuð til að reikna út heildarstofnstærð rjúpunnar í landinu. Veiðimenn, sem tilbúnir eru að taka þátt í þessari könnun, eru beðnir um að klippa annan vænginn af öllum þeim rjúpum sem þeir fella. Fuglum af sama veiðisvæði eða úr sömu sveit ber að halda sér í poka þannig að hægt sé að sundurgreina sýnin eftir landshlutum.

Vængina á að senda til

Náttúrufræðistofnun Íslands
Pósthólf 5320
125 Reykjavík

Stofnunin mun greiða sendingarkostnað sé þess óskað. Menn eru beðnir um að láta nafn sitt og heimilisfang fylgja með sýnum þannig að hægt sé að senda þeim, sem það vilja, niðurstöður greininga úr þeirra sýni og heildarniðurstöðurnar í lokin.

Litur flugfjaðra segir til um aldur

Til að aldursgreina rjúpur bera menn saman lit á flugfjöður nr. 2 og flugfjöður nr. 3 (talið utan frá). Fjaðurstafurinn sjálfur er alltaf dökkur hjá íslenskum rjúpum óháð aldri, en við erum að bera saman litinn á föninni sjálfri, ekki fjaðurstafnum. Hjá fuglum á 1. ári er flugfjöður nr. 2 dekkri en nr. 3 eins og hér sést. Ef smellt er á myndina hér til vinstri, sést samanburðurinn. Hjá fullorðnum fuglum, fuglum á 2. ári og eldri, eru fjaðrir nr. 2 og 3 jafndökkar eða nr. 3 dekkri. Hjá sumum fullorðnum fuglum eru engin litarefni í fönum flugfjaðra nr. 2 og 3.