Svæðið er tilnefnt vegna jarðminja. Það er innan tillögusvæðisins Ytri-Rangá, sem tilnefnt er vegna ferskvatnsvistgerða.
![Fossabrekkur Fosssabrekkur](/sites/default/files/styles/original_medium/public/externals/eec8c9559395b675a10044a777f2c053.jpg?itok=VO4AIjsy)
Mörk
Mörk miðast við fossbrún og 200 m jaðarsvæði út frá henni.
Lýsing
Fossabrekkur eru í Rangárbotnum þar sem Ytri-Rangá, sem er vatnsmikil lindá og myndar gróðurvin í sendnum auðnum, sprettur fram í láginni vestan Næfurholtsfjalla sunnan Landmannaleiðar. Auðnirnar eru víðáttumiklar og að miklu leyti myndaðar í gjóskugosum frá Heklu. Gjóskubunkarnir hafa mikla vatnsleiðni og sígur leysinga- og úrkomuvatn í gegnum gjóskulögin og sprettur fram sem kaldar lindir í Rangárbotnum. Lágir en breiðir fossarnir eru þar sem Ytri-Rangá fellur fram af Sigölduhrauni, en hraunið á uppruna sinn í Bárðarbungu-eldstöðvakerfinu og rann fyrir um 4.500–7.000 árum.
Fossabrekkur er vinsæll viðkomustaður ferðamanna en aðgengi að þeim er gott af Landvegi.
Forsendur fyrir vali
Formfagur lindárfoss þar sem áin myndar gróðurvin í ljósleitum gjóskuauðnum Heklu. Með bökkum árinnar eru hvannstóð og grösugir bollar sem skapa miklar andstæður við vikurauðnirnar umhverfis.
Ógnir
Vikurvinnsla, frístundabyggð, ferðamennska og ágengar tegundir.
Aðgerðir til verndar
Banna námavinnslu í grennd við fossana, byggja upp innviði til varnar skemmdum vegna átroðnings, koma í veg fyrir dreifingu ágengra tegunda og tryggja að jaðarsvæðum sé ekki raskað í að minnsta kosti 200 m fjarlægð frá útmörkum Rangárbotnanna.
Núverandi vernd
Núverandi verndarsvæði | Staða |
---|---|
Hekla | Aðrar náttúruminjar |
Náttúruverndarlög | Aðrar náttúruminjar |
Ytri-Rangá | Aðrar náttúruminjar |
Útgáfudagsetning
Gefið út: 2020-12-03![Map of Fossabrekkur Location of area Fossabrekkur in iceland](/sites/default/files/styles/original_medium/public/externals/1b53058ca5538331996d3e8ec3793747.jpg?itok=Plz17tId)