Fréttir

Lúsmý nýtur góðs af góðviðrinu

21.06.2019
Lúsmý úr fiðrildagildru
Mynd: Erling Ólafsson

Nýlegt sýni lúsmýs (Culicoides reconditus) úr fiðrildagildu í Kollafirði (smásjármynd).

Lúsmý hefur haldið uppteknum hætti það sem af er sumri, jafnvel aðgangsharðara en áður og nokkuð fyrr á ferðinni. Það hefur notið góðs af blíðunni sem ríkt hefur á sunnanverðu landinu. Líkast til er lúsmýið gamalgróið en hefur sloppið yfir þröskuld sem hélt því í skefjum. Gerðist það sumarið 2015 svo um munaði og hefur leikið lausum hala á suðvestanverðu landinu síðan, heldur illa þokkað. Ef til vill koma loftslagsbreytingar hér við sögu.

Á Náttúrufræðistofnun Íslands hefur verið fylgst með framvindu lúsmýs og upplýsinga safnað. Dregist hefur að koma fróðleik á framfæri þar sem treglega gekk að finna tegundinni fræðiheiti. Þegar tegundarheiti liggur ekki fyrir er ómögulegt að afla upplýsinga um útbreiðslu og lífshætti. Í Evrópu eru skráðar um 570 tegundir lúsmýs, flestar illþekkjanlegar. Nú er niðurstaða loks fengin og ber lúsmýið okkar heitið Culicoides reconditus. En þar með voru ekki allar hindranir að baki því svo vill til að tegund þessi er illa kynnt og litlar sem engar upplýsingar um lífshætti hennar að hafa. Þær upplýsingar sem liggja fyrir hafa nú verið teknar saman ásamt öðrum fróðleik.

Undanfarið hefur mikið verið leitað til Náttúrufræðistofnunar eftir upplýsingum um lúsmýið en ekki verið hægt að sinna því á sama tíma og legið var yfir gögnum til að koma á þau skikk. En nú liggur fyrir samantekt sem hefur verið birt á pödduvef Náttúrufræðistofnunar. Þar má lesa fróðleik um tegundina lúsmý og frekari fróðleik um lúsmýsætt.