Kortlagning skógarkerfils og spánarkerfils á grænum svæðum í Reykjavík

Skógarkerfill
Skógarkerfill er reskitegund (þrífst vel í röskuðu landi) sem er hraðvaxta og dugleg í samkeppni við annan gróður. Hann vex best í fremur rökum og frjósömum jarðvegi þar sem gott framboð er af köfnunarefni. – Ljósm. Hörður Kristinsson
Spánarkerfill
Spánarkerfillinn verður nokkuð yfirgangssamur í frjóum og áburðarríkum jarðvegi og getur reynst erfitt að uppræta hann. – Ljósm. Hörður Kristinsson

Nýverið kom út í vísindatímaritinu „Invasive Plant Science and Management“ grein sem fjallar um útbreiðslu villts skógarkerfils (Anthriscus sylvestris) og spánarkerfils (Myrrhis odorata) á grænum svæðum í Reykjavík. 

Þéttbýli eru í auknum mæli álitin mikilvæg svæði fyrir líffræðilega fjölbreytni. Innfluttar tegundir ógna þessari fjölbreytni og þéttbýlisstaðir geta orðið miðstöð fyrir dreifingu þeirra. Verkefnið gekk út á að kortleggja dreifingu skógarkerfils og spánarkerfils á grænum svæðum í Reykjavík í samræmi við það markmið í stefnu borgarinnar um líffræðilega fjölbreytni, að spornað verði gegn ágengum tegundum. 

Í maí til október 2017 voru fjögur svæði kortlögð: Laugarnes, Vatnsmýri, Elliðaárdalur og Ægissíða. Í ljós kom töluverð útbreiðsla skógarkerfils en hann náði yfir að minnsta kosti 10% af heildarsvæðinu sem var skoðað (158 ha). Spánarkerfill var staðbundnari og útbreiðsla hans var ≤1 ha. Báðar tegundir voru algengar nálægt byggingum, göngustígum, árbökkum og lækjum. Lagðar eru fram tillögur sem felast í langtímavöktun og heildstæðri stjórnunaráætlun til að stýra útbreiðslu skógarkerfils og annarra framandi plantna.

Snorri Sigurðsson  líffræðingur hjá Náttúrufræðistofnun er einn af höfundum greinarinnar.

Nánari upplýsingar er að finna í greininni: 

Luoma, M.O., M. Tamayo og S. Sigurðsson 2024. Mapping Wild Chervil (Anthriscus Sylvestris) and Anise (Myrrhis Odorata) in Urban Green Spaces: A Subarctic Case Study. Invasive Plant Science and Management 2024: 1–35. https://doi.org/10.1017/inp.2024.39