Náttúrufræðistofnun hlýtur tvo styrki úr Orkurannsóknasjóði Landsvirkjunar

Náttúrufræðistofnun hlaut tvo styrki úr Orkurannsóknasjóði Landsvirkjunar við hátíðlega athöfn 6. mars síðastliðinn. Styrkirnir renna til verkefnanna „Setjum senditæki á íslenska refi“ og „Visterfðafræði hæruburstar – lykill að skilningi og stjórnun á útbreiðslu mosategundarinnar“ og er hvor styrkur upp á tvær milljónir króna.

Ferðir íslenska refsins rannsakaðar með senditækjum
Íslenski refurinn er útbreiddur allt í kringum norðurheimskautið og víða erlendis hafa verið gerðar rannsóknir á fari hans með notkun senditækja. Hérlendis var slík rannsókn síðast framkvæmd á níunda áratug síðustu aldar í Ófeigsfirði á Ströndum, þegar refastofninn var í lágmarki eða færri en 2.000 dýr. Nú hefur stofninn vaxið í um 9.000 dýr en áhrif stofnbreytinga, umhverfisbreytinga og fyrirhugaðrar vindorkunýtingar á útbreiðslu, ferðir og afkomu refsins eru enn óþekkt.

Til að svara þessum spurningum og leggja mat á ferðir refa verða hálsbönd með gervihnattasendum sett á refi á þremur svæðum: Vestfjörðum, Austurlandi og Suðvesturlandi. Verkefnið er hluti af stærra rannsóknarverkefni um stofngerð íslenska refsins og sem hefur það að meginmarkmiði að leggja mat á stofnbreytingar undanfarna fjóra áratugi. Þar er áhersla lögð á landfræðilegan mun innan íslenska refastofnsins, greiningu á líffjölbreytileika, svipgerð og erfðaefni.

Nákvæmt mat á stofngerð tófunnar verður ekki unnið nema með góðri þekkingu á farhegðun og umfangi fars milli búsvæða. Rannsóknarhópurinn hefur um nokkurt skeið leitað eftir fjármagni til kaupa á senditækjum og kemur styrkurinn sér afar vel til að verkefnið verði loks að raunveruleika. Verkefninu stýrir Ester Rut Unnsteinsdóttir spendýravistfræðingur.