Svæðið er tilnefnt vegna fjöruvistgerða og fugla.

Mörk
Strandlengjan frá Sölvahamri og Arnarstapa að Rifi. Inn til landsins afmarkast við Sandahraun, Bárðarkistu, austur fyrir Snæfellsjökul og til strandar vestan Háahrauns.
Lýsing
Strönd Snæfellsnes er fjölbreytt þar sem skiptast á grýttir vogar, strendur og sjávarhamrar. Við Hellnar er fjörubeðurinn fremur grófur og brimasemi nokkur og við Öndverðarnes er fjörubeðurinn áberandi grýttur með glufóttum hraunklöppum og brimasemi er talsverð eða mikil. Láglendið er að mestu hulið sæmilega grónum hraunum og um miðbikið rísa fjöll og ber þar mest á Snæfellsnesjökli. Vinsælt útivistarsvæði og sem áfangastaður ferðamanna. Lítils háttar búfjárbeit og æðardúntekja. Byggðakjarnar eru á Hellissandi og Rifi með tilheyrandi starfsemi og talsvert er um orlofshús, t.d. á Hellnum og Arnarstapa þar sem einnig er mikið notuð smábátahöfn.
Forsendur fyrir vali
Á tveimur fjöruköflum er fjölbreytt og sérstætt lífríki. Við Hellnar er fjaran rík af fjörupollum með fjölbreyttu lífríki og áberandi klóþangsfjöru. Við Öndverðarnes er strandlengjan rík af skjólsælum glufum, skorum og fjörupollum sem fóstra sérstætt lífríki, þrátt fyrir að ríkjandi vistgerðir séu brimasamar hnullunga- og hrúðurkarlafjörur. Töluverðar sjófuglabyggðir eru á svæðinu og nær kríuvarpið alþjóðlegum verndarviðmiðum.
Vistgerðir
Vistgerð | km2 | Hlutfall af heildarflatarmáli (%) | |
---|---|---|---|
Fjara | 0,51
|
1 | |
Sérstök fjörusvæði | 0,14
|
1 |
Fuglar - Sjófuglabyggðir
Nafn | Árstími | Fjöldi | Ár | Hlutfall af íslenskum stofni (%) |
---|---|---|---|---|
Kría (Sterna paradisaea) | Varp | 12500
|
2016 | 6,0
|
Ógnir
Mikil og vaxandi ferðamennska, uppbygging í þéttbýli, áætlanir um nýtingu vindorku, mengun tengd hafnarstarfsemi og skipaumferð. Bílaumferð í gegnum þétt varpsvæði kríu. Vaxandi útbreiðsla lúpínu.
Aðgerðir til verndar
Svæðið er friðlýst að miklum hluta; þjóðgarðurinn Snæfellsjökull var stofnaður árið 1999 og eins er fjaran milli Hellna og Arnarstapa friðlýst frá 1979. Tryggja þarf verndun kríuvarps milli Hellissands og Rifs og takmarka frekari landfyllingar og rask í fjöru. Stýra betur umferð ferðafólks og styrkja almennt vernd í gegnum stjórnunar- og verndaráætlun.
Núverandi vernd
Núverandi verndarsvæði | Staða |
---|---|
Ströndin við Stapa og Hellna | Friðland |
Þjóðgarðurinn Snæfellsjökull | Þjóðgarður |
Útgáfudagsetning
Gefið út: 2018-04-05 Síðast uppfært: 2020-05-26